MECARU TILEM KAPITU

Panjer, 29 Januari 2025
Bhuta Yadnya sane sampun kelaksanayang ring Desa Adat Panjer, ngawit saking mabanten saiban/jotan sawusan maratengan, segehan nyabran rahina taler rikala Kajeng Kliwon, lan macaru, miwah rahina-rahina sane mabuat manut kecap sastra agama. Punika taler macaru manut dresta desa, pituduh sang sulinggih miwah saking Prajuru Desa kasarengin antuk pemangku Kahyangan Tiga.
Ring Desa Adat Panjer Ngelaksanayang Upacara Butha Yadnya caru Sasih Tilem Kapitu nemonin rahina Anggara Pinanggal 28 Januari 2025, caru punika kemargiaang sandikala inggih punika :
Caru ring suang-sung lebuh : namceb sanggah cucuk medaging kober gana, muncuk tiing gading, medaging don kayu tulang, Sujang medaging arak berem lan toya anyar.
Banten sane munggah ring sanggah cucuk inggih punika: Daksina, ketipatsari akelan, canang lengawangi, burat wangi, peras penyeneng alit, banten danan, nasi barak saha rerasmen meraka saha wenang.
Ulam ayam biing ( mepanggang mesisit ) segehan putih kuning duang tanding.
Banten ring sor ( beten ) sanggah cucuk : Segehan Panca Warna limang sorong, api takep sambuk, tetabuhan arak berem, tuak, toya anyar.
Caru Ring Natar Paumahan :
Nasi Punjungan Apunjung metatakan don biu lan rerasmen saha wenang.
Ulamnyane : Bawi maolah : Urab Barak, Urab Putih, sesate lembat, sesate asem.
Segehan Panca Warna limang tanding, Canang Lengawangi, Burat wangi, tetabuhan arak berem, tuak, toya anyar
Upakara ring suang-suang Pempatan pateh sekadi ring ajeng, nangih caru Eka Sata ( ayam brumbun ) saha penimpug lan eedan ipun.
Sesuhunan Ida Ratu Ayu maka Catur lan Ratu Ngurah Agung Mintar sewewidangan Desa Adat Panjer.
Ring Catus Pata Desa Adat Panjer Ida Sesuhunan jagi Ngrangsuk Busana Napak Caru.
Mogi Rahayu Sareng Sami.